unabhängige Liste Lindorf

Im ledschda Jahrhundert, do ischs gschäha,
3 Fraua ond 5 Männer sends gwäa,
zemmakomma send se zu Rat ond Tat
dees war dr erschde Ortschaftsrat.
Damals hend se sich droffa em Jugendraum
anstatt em Rathaus- mr glaubd es kaum.
„En Schultes muess da vorna no,
do brauchd mr oin, där dees ao ko.”
Diskudierd hend se rom ond nommanchmol
gscheid ond manchmal domm.
Ond koiner woiß jetzt was ond wie.
„Bevors en Fremder machd, machs i!“
hod do dr Haacka Manne gsaid
ond älle Leedorfer hend sich gfraid.
Neubürger geits em roda Morga,
Bebauungspläne mached Sorga.
Da honda hod‘s en Haufa Schmutz
d‘ Ortschaftsrät mached en Fleggeputz.
Von dr Autobah kommt an Riesaschall,
mr diskutierd übern bessra Lärmschutzwall.
Dem Heimerl sei Trass kommt au no drzua,
dr Ortschaftsrat fendet überhaupt meh koi Ruh.
Die oinzig Lösung isch a Tunnel.
Do kennat se fahra, ond zwor ganz schnell.
Ma hat dazu viel politisiert
ond‘s Rathaus wird jetzt au saniert.
Nach Leedorf ziehat emmer meh Leit.
Des isch so blieba, sogar bis heit.
Mr goht jetzt an die Dorfplatzplanung,
ond plötzlich kriagt mr ganz viel Ahnung
von lange Bänk und neuem Brunna,
s Leedorfer Lied hen mr zor Eiweihung gsonga.
D‘Feldweg werdet schdändig grichtet.
En neuer Ortschaftsrat wird verpflichtet.
Der kümmert sich ums Hundeklo
und Biotope sowieso.
Mr beschäftigt sich mit Hochwasserschutz
ond wieder amol geits en Fleggaputz.
Des Komposchtwerk wird zom Problem,
d`Leedorfer fendet dees sehr unangenehm.
Dr Gschtank und auch die Fliegenplage
beschäftigt uns sehr viele Tage.
Des älles isch bis jetzt passiert
ond jetzt wird ao amol s‘Backhäusle saniert.
Auch bei de lokale Verkehrsfragen
Hatte dr Ortschaftsrat was zum sagen.
30-iger Zonen und neue Ortseingänge
zwingen Autofahrer in die Enge.
Radfahrer waren uns immer wichtig
d`Verkehrsberuhigung isch für uns bis heit no richtig.
Lichtlesglomp, Kanalisierung
Geothermie und Projektierung
für en bsondra Kindergarda.
D‘ Schdadtverwaltung ko s kaum erwarta.
En Leedorf ko mr viel ausprobiera,
do ko ganz Kirchheim drvo profitera.
Ond wenn nix mehr gohd ond nix bassiert,
no wird halt´s Rathaus wieder mol saniert.
25 Jahr Ortschaftsrat! Den Räten wurd es do niemals fad.
Mr hod mit dr Stadt und de Leid gerunga,
und doch isch Vieles wohl gelunga.
Au wenn manche moinet, des wär zom Lacha,
Se sollet‘s erscht mal selber besser macha.

© Uschi Neroladakis / Thomas Wachsmann Dez2016